+++ ရှက်လိုက်တာ +++
ရှက်လိုက်တာ
မြင်းမိုရ်တောင်ဦးမက ကျူးတဲ့
သမိုင်းဟာ ဒီလိုပဲ နိဂုံးချုပ်ခဲ့ရတယ်။
အငိုတိတ်စေတဲ့
ရင်ခွင်နဲ့ မေတ္တာတရားအတွက်
ကျေးဇူးမဆပ်နိုင်ခြင်းပဲ ကျန်တယ်။
ကျွေးမွေးသုတ်သင်ခဲ့တဲ့
လက်ချောင်းတွေအတွက်
တစ်ရှိုက်မှ မနမ်းနိုင်ခြင်းပဲကျန်တယ်။
နေမကောင်းတိုင်း ချော့တိုက်ခဲ့တဲ့ ဆေးခါးတွေအတွက်
နောင်တခါးခါးတွေပဲ ကျန်တယ်။
ချွေးတွေနဲ့ စိုစိုရွှဲ အိပ်ရာက လန့်နိုးတိုင်း
ပွေ့ဖက်သိပ်တတ်တဲ့ မျက်နှာတစ်ခုအတွက်
ငါ့မှာ
မျက်နှာပူပူ တစ်ခုပဲ ကျန်တယ်။
ရှက်လိုက်တာ။
ဟောဒီမှာ
တယုတယ တိုက်ခဲ့တဲ့ ဆန်ပြုတ်ချိုင့်လေးလောက်မှ
ဇောက်မနက်တဲ့ကောင် တစ်ကောင် ကျန်တယ်။
ချမ်းညီချို
25-04-2010
No comments:
Post a Comment