+++ တယ်လီဖုန်း +++
ဆန်းပြားတဲ့ ဟောဒီ လောကပါပဲ။
လေထဲကနေ ခုန်ချလိုက်
ကြိုးထဲကနေ တွားတက်လိုက်နဲ့...
နီးနီးလေးလို
အဝေးက အသံကိုတောင်ကြားရတယ်။
အနားမှာပဲ ရှိနေသလား
ကပ်ထားတဲ့ ပါးတစ်ဖက်ဟာလည်း
နွေးလို့ကို လာနေတယ်။
ငြင်းလို့မရတဲ့ ဖွင့်ဆိုချက်လို
ရင်ခုန်သံကို မြန်အောင်လုပ်
မမြင်ရတဲ့ လှိုင်းတွေနဲ့တောင်မှ
ဒီရင်ကို ရိုင်းလာအောင် လုပ်တယ်။
အဲဒါပါပဲ
မင်းရယ် ငါရယ် တယ်လီဖုန်းရယ်
နားနှစ်ဖက်ကြားမှာ ကပ်ငြိနေခဲ့ကြပုံများရယ်...။
ကဲ ဘယ်လိုလုပ်မလဲ
ဒီအသံကိုပဲ ထပ် ထပ်ကြားချင်နေပြန်တော့တယ်။
ချမ်းညီချို
12-03-2010
No comments:
Post a Comment