နာရီလက်တံများ တစ်ပတ်လည်သွားမှ၊ ငှက်ကလေးတွေက သီချင်းတစ်ပုဒ်ကို ထိုးမှဆိတ်မှ နေ့သစ်တစ်ခုသို့ ရောက်မည်ကို သိသော်လည်း ည၏အစိတ်အပိုင်းတစ်ခုထဲမှာပင် သူမကိုလိုက်လံရှာဖွေမိပါသည်။ ညကတော့ လရိပ်အောက်တွင် လှမြဲလှလျှက်။ သူမအတွက် ကော်ဖီတစ်ခွက်နှင့် ရောသောက်ရန် ကြယ်သားနုနုထွတ်ထွတ်များကို မိုးထိအောင် လှေကားထောင်၍ ဆွတ်ယူပေးရန် စိတ်ကူးမိသည့်အခိုက် ကြယ်စင်တစ်ပွင့် ကြွေကျလာခြင်းသည် ကြယ်ကြွေညတိုင်း ဆုတောင်းမယ်ဆိုသော သီချင်းတစ်ပုဒ်ကို အမှတ်ရစေပါသည်။
ဘာဆုမှ မတောင်းရခင် တောင်းတဲ့ဆု(တွေ) ပြည့်ပါစေဟု ဆုတောင်းပြီးချိန်၌ ကြယ်ကြွေသည် ကမ္ဘာ့ လေထုနှင့် ပွတ်တိုက်ပွန်းပါး၍ ပျောက်ကွယ်သွားပြီဖြစ်သောကြောင့် ဆုတောင်းရန်အတွက် နောက်ထပ် ကြယ်ကြွေချိန်ကို စောင့်ရပါဦးမည်။ ဘာဆု(များ)ကို တောင်းရင် ကောင်းမလဲ။
သူမနှင့် နီးရပါစေသားလို့ ဆုတောင်းရင် ကောင်းမလား။ (နီးနီးလေးနဲ့ ဝေးနေရင် ဘယ်လိုလုပ်မလဲ။) သူမကို မြင်ခွင့်တွေ့ခွင့်လောက်တော့ ရပါစေသားလို့ ဆုတောင်းရင်ကော။ (မြင်သာမြင် မကြင်ရဆို ဘယ်လိုလုပ်မလဲ။) သူမကို ပိုင်ဆိုင်ခွင့် ရပါစေသား ဆိုရင်ကော။ (ဈေးတန်းက သွေးစိမ်းရှင်ရှင် ငါးတစ်ကောင်ကို ပိုင်ဆိုင်ရသလို၊ ပွဲဈေးတန်းက အရုပ်ငါးတစ်ကောင်ကို ပိုင်ဆိုင်ရသလို၊ အလှမွေးကန်ထဲက ငါးတစ်ကောင်ကို ပိုင်ဆိုင်ရသလိုမျိုး ဖြစ်နေရင် ဘယ်လိုလုပ်မလဲ။ လိုချင်တာက လွတ်လပ်စွာ ကူးခတ်နေပြီး နှလုံးသားကို ဝင်ရောက်တိုးဝှေ့တိုက်ခတ်သွားမယ့် ငါးလေးတစ်ကောင်။)
အချစ်နှင့် တပ်မက်ခြင်းသည် အတူတွဲ၍ လာတတ်ပါသလား။ (ကျွန်တော် မသိပါ။)
အချစ်နှင့် တပ်မက်ခြင်းက အတူတူပဲလား။ (ကျွန်တော် မသိပါ။)
အချစ်ဘဝတည်ဆောက်ရန် စီမံလျှာထားချက်များ၊ သူမက ဖြည့်ဆည်းပေးရမည့် ကျွန်တော့် ဘဝလိုအင်စာရင်းဇယားများ၊ နီရဲစိုထွေးသော နှုတ်ခမ်းဖျားမှ တဆတ်ဆတ်တုန်ခါနေသော ကြင်နာမှုများ၊ ပါးချင်းအပ်၍ထားစဉ် သဲ့သဲ့မျှကြားလိုက်ရသော ပင့်သက်သံ၏ ပူနွေးလတ်ဆတ်မှုများ၊ သူမ၏ နှလုံးသားအတွင်းမှ အချစ်ဆိုသော အရိပ်အယောင်များ၊ ဘာမှ မလိုချင်ပါ။
သူမကို ချစ်နေခွင့်သာ လိုချင်ပါသည်။ သူမကို ချစ်နေခွင့်သာ လိုပါသည်။ (သူမကို ချစ်နေဖို့သာ လိုအပ်ကြောင်း သူမနားလည်သဘောပေါက်နိုင်မည် ထင်ပါသည်။)
ဟော ကြယ်တစ်စင်း ကြွေကျလာပြီ ။
"... ..."
ချမ်းညီချို
04-07-2010
No comments:
Post a Comment