ငါ့ဆီလာ၍ ပြန်ထွက်သွားသော အချစ်ဝထ္ထု နှင့် အခြားဝထ္ထုတိုများ (၄)

+++ ငါ့ဆီလာ၍ ပြန်ထွက်သွားသော အချစ်ဝထ္ထု နှင့် အခြားဝထ္ထုတိုများ (၄) +++

အဲဒါ အသစ်မဟုတ်ပဲ နေရောင်နဲ့ ပြန်သထားတဲ့ နေ့တစ်နေ့မှာပါ။

တကယ်တမ်းတော့ စိတ်ရဲ့ အသုံးစရိတ် စာရင်းကိုပြလို့ ခရီးစဉ်တစ်ခုတောင်းယူခဲ့ခြင်းဖြစ်ပြီး ခင့်ဘက်သို့ မျက်နှာမူ၍ အသက်ရှုတဲ့အခါ နေလုံးနီနီက ပြုံး၍ ကြည့်ပါတယ်။

နေလုံးနီနီရေ
ကျွန်တော်အထူး ကျေးဇူးတင်ပါတယ်
ပန်းတွေဝတ်ထားတဲ့
နှင်းကို မင်းချွတ်ချလိုက်တဲ့အခါ
သဘာဝရဲ့ ကိုယ်ထည်လှလှကို
အထင်းသား ကျွန်တော်မြင်တွေ့ခွင့်ရလို့။

လေကောင်း လေသန့်တွေ၊ ပန်းခင်းတွေ၊ နှင်းစက်တွေနဲ့ မြို့ကလေးတွေ၊ အားလုံး ဒီနေရာမှာ။ ဒီနေရာလေးဟာ တကယ်တော့ ကဗျာရေးဖို့ မကောင်းပါဘူး၊ မွှေးရနံ့တွေကိုသာ ဒီအတိုင်း ငေးကြည့်နေဖို့ ကောင်းပါတယ်။

ကျွန်တော် အရူးအမူးဖြစ်ခဲ့တာကလည်း အိပ်မက်ထဲက မွှေးမြတဲ့ နားရွက်ကလေး တစ်ဖက်ပါပဲ။

အဲဒီနေ့က ခင်ဆိုပြီး ရင်တုန်လာလို့ လက်ကလေးနဲ့ ဖိထားရတယ်။

အဲဒီနေ့က ခင်ဆိုပြီး ခေါင်းမူးလာလို့ ငြိမ်ငြိမ်လေး ထိုင်နေရတယ်။

အဲဒီနေ့က တစ်ယောက်တည်း သစ်ပင်အောက်မှာ ထိုင်နေတုန်း ကျွန်တော့်နံဘေးကို သစ်ရွက်လေးတစ်ရွက် (ဖြုတ်ကနဲ) ကြွေကျလာလို့ ပြာပြာသလဲ ဒီနေမှာ လူရှိတယ်လို့တောင် ပြောလိုက်မိပါတယ် ခင်။

ကောင်းကင်မှာ ကျပ်ကျပ်တည်းတည်း ပျံသန်းသွားတဲ့ ငှက်တစ်အုပ်ကို အခွင့်ကောင်းယူပြီး ကျွန်တော် ထွက်ပြေးလွတ်မြောက်သွားချင်ပါတယ်။ ဘယ်က လာသည်မသိ၊ ဘယ်ကို သွားမည်မသိ၊ ဘာငှက်တွေဟူ၍လည်း သိစရာ မလိုပါ။

ကျွန်တော် လူမှန်းသိလာသော်လည်း ဘာလူမှန်းမသိပဲဖြစ်နေတတ်သောကြောင့် အဲဒီငှက်တွေကိုလည်း ဘာငှက်မှန်း မသိခြင်းဟာ အပြစ်တင်စရာ ကိစ္စတစ်ခုမဟုတ်ဘူးလို့ ထင်ပါတယ်။

အဲဒီ မသိမှု၌ပင်လျှင် ကျွန်တော်ဟာ စိတ်ရဲ့ တောင်ပံများကို ဖြန့်လို့ ခင့်ဆီကို ပျံသန်းနေပါတယ်။

ကျွန်တော် ခင့်ကို လွမ်းပါတယ်။ ကျွန်တော် ခင့်ဘက်ကို မျက်နှာမူပြီး အသက်ရှုနေပါတယ်။

နှလုံးသားတစ်ရပ်စာမြင့်တဲ့
မျှော်စင်တစ်ခုဆောက်ပြီး
ကမ္ဘာဦးအစကို လှမ်းကြည့်လိုက်တော့ ..

မီးကို စတင် တွေ့ရှိသူဟာ ကျွန်တော် ဖြစ်နေလေရဲ့။

အဲဒါ အသစ်မဟုတ်ပဲ နေရောင်နဲ့ ပြန်သထားတဲ့ နေ့တစ်နေ့မှာပါ ခင်။

ချမ်းညီချို
06-05-2010
အပိုင်းအစများ
မောင်သိန်းဇော် - ခင်
မောင်သိန်းဇော် - နှင်းရည်စက်လက်
မောင်သိန်းဇော် - အပူသည်
ချမ်းညီချို - ခင်