အပေါ်မှာဘာတွေ ရှိနေသည်ကို သိချင်ပါသလား။
ဘာတွေရှိနေလိမ့်မည်နည်းဟု မစဉ်းစားရန် အကြံပေးလိုပါသည်။
ဥယျာဉ်တစ်ခု နှင်းဆီပန်းအပြည့် ရှိချင်ရှိနေမည်။ ဒုံးပျံ အစင်းတစ်သောင်း တပြိုင်နက် ထွက်သွားစေနိုင်သော ခလုတ်နီနီ ဝိုင်းဝိုင်း တစ်ခု ရှိချင်ရှိနေမည်။ ပညာများဖြင့် လေးလံထိုင်းမှိုင်းနေသော ပါမောက္ခအိုကြီး တစ်ယောက် ရှိချင်ရှိနေမည်။ ဝင်းဝါသွယ်မွတ်သော ခြေသလုံးကလေးများ တက်သွားသည့် လှေကားတစ်စင်း ရှိရှင်ရှိနေမည်။ ဖန်တီးရှင်၏ လက်ချောင်းများ သို့မဟုတ် ပျက်ပြယ်သွားသော လက်ထပ်စာချုပ်တစ်ခုလည်း ရှိချင်ရှိနေမည်။ ခွဲစိပ်သော လေဆာရောင်ခြည် ဓားတစ်လက်နှင့် ရွှေရောင်မျှော်လင့်ချက်တို့လည်း ရှိချင်ရှိနေမည်။ ပန်းချီကားတစ်ချပ်နှင့် စကားလုံးမဲ့ ကဗျာတစ်ပုဒ်လည်း ရှိချင်ရှိနေမည်။
အပေါ်မှာဘာတွေ ရှိနေသည်ကို ...
သိသည်ဟု ထင်နေသူသည် စားပွဲထိပ်တွင် ထိုင်နေသည်။ ဝင်းလဲ့ တောက်ပသော နေရောင်ခြည်သည် ချိုအီသော စားကောင်းသောက်ဖွယ်များကို ပုပ်သိုးသွားစေပါသည်။ ရှေ့က သွားနှင့်သူတွေ များလှပြီ။ သူတို့ ဘယ်မှာနည်း။ မသိနိုင်၊ ကျွန်တော်သည် သိချင်သူ မဟုတ်။ ခံစားသူသက်သက်သာ ဖြစ်ပါသည်။ ပင်လယ်ကို ကူးနိုင်သည်ဟု ဂုဏ်ယူနေဟန်ရှိသော ပုစွန်ဆိတ်တွင် ဦးနှောက်မရှိဟု ကြားဖူးသည်။ ခံစားမှုသက်သက်အတွက်သာဆိုရင် ဦးနှောက်ရှိဖို့မလိုဟု ကြားဖူးသည်။
ထို့ကြောင့် ကျွန်တော် သေပြီ။ သံသရာတစ်ဘက်ကမ်းသို့ ကူးပြောင်းရန် လှေခကြီးလွန်းလှသည် ထင်သောကြောင့် ကျွန်တော်သေလျှင် ဝတ်သစ်ချပင်ခြေရင်းတွင် မြှုပ်နှံ၍ အုတ်ဂူပေါ်မှာ အဝါရောင်ပန်းစည်းတစ်စည်း ချလှည့်ပါ ဘာညာ မှာကြားမှု မပြုခဲ့ပါ။ အကယ်၍ ဖြစ်နိုင်မည် ဆိုပါလျှင် အပေါ်မှာဘာတွေ ရှိနေသည်ကို မသိချင်ခဲ့ပါ။ ကျွန်တော် သိသလိုရှိပြီး မသိခဲ့သော "အချိန်ဆိုသည်မှာ ဘာလဲ" ကိုသာ စဉ်းစား၍ အဖြေပေးစေလိုပါသည်။
(အကယ်၍ ဖြစ်နိုင်မည် ဆိုပါလျှင် ဗိုက်ဆာ၍ ငိုနေသောကလေးကို ထမင်းမကျွေးနိုင်လို့ ရိုက်နှက်သော မိဘများ ဝင်ရောက်ဖြေဆိုခြင်း မပြုပါနှင့်။ ကျေးဇူးတင်ပါသည်။)။
ချမ်းညီချို
30-07-2010
(ညွှန်း = ဇော်ဇော်အောင် - နေယျဒေါသ)
No comments:
Post a Comment