အပြာရောင် ဂြိုဟ်သားများ (၁၄)

ကျွန်တော့် အမအကြီးဟာ ကျွန်တော့်ကို တော်တော်လေး ချစ်ပါတယ်။ ဘယ်လောက်တောင်ချစ်သလဲဆိုရင် အမှတ်တရဖြစ်အောင်ဆိုပြီး ကျွန်တော့်တူမလေးတွေကို ကျွန်တော့်မွေးနေ့ မတ်လ(၆)ရက်နေ့မှာ ဗိုက်ခွဲပြီး မွေးပေးခဲ့တဲ့ အထိပါပဲ။ ဆရာဝန်ရဲ့ အဆိုအရ စောင့်မယ်ဆိုရင် နောက်ထပ် ငါးရက်၊ တစ်ပတ်လောက် စောင့်လို့ရနေသေးတယ်။ ဒါပေမယ့် မမကတော့ ကျွန်တော့်မွေးနေ့မှာ အမှတ်တရဖြစ်အောင်၊ သူ့သမီးလေးတွေနဲ့ မွေးရက်ချင်းတူအောင်ဆိုပြီး ဗိုက်ခွဲပြီး မွေးပစ်လိုက်တာပါပဲ။ ကျွန်တော့် ရင်ထဲမှာ ဘယ်လိုရှိမလဲ မေးစရာ မလိုပါဘူး၊ ကျွန်တော် အရမ်း ပျော်ပါတယ်။ ကျွန်တော့်အမကို အရင်ကထက် ပိုချစ်မိလာတယ်။ ကျွန်တော့်ယောက်ဖ ရင်ထဲမှာကော ဘယ်လို ရှိမလဲ စဉ်းစားကြည့်နိုင်ပါတယ်။ သူ့ခမျာ အချိန်မစေ့ခင် မွေးမှာမို့လို့ သူ့မိန်းမအတွက်ကော၊ ကလေးတွေအတွက်ပါ အရမ်းစိုးရိမ်နေရတော့တာပေါ့။ သူ့နေရာမှာ တခြားလူသာဆိုရင် စိတ်ဆိုးကောင်း ဆိုးပါလိမ့်မယ်။ ကျွန်တော့်အမကိုသာမက ကျွန်တော့်ကိုပါ ဒေါသတွေလှိမ့်ထွက်နေလောက်ပါတယ်။ ဒါပေမယ့် ကျွန်တော့်ယောက်ဖက အပေါ်စားရုပ်ရှင်တွေထဲကလို အကိုတွေ၊ မောင်တွေနဲ့ အဆင်မပြေတဲ့ ယောက်ဖမျိုး မဟုတ်ဘူး။ သူကလည်း ကျွန်တော့်ကို ညီအရင်းတစ်ယောက်လို ချစ်တဲ့ ယောက်ဖဆိုတော့ သူလည်း ပျော်တယ်။ ဒီလိုနဲ့ပဲ အခုတော့ ကျွန်တော့်တူမအမြွှာလေးနှစ်ယောက်ဟာ  ကျွန်တော်နဲ့  မွေးရက်အတူတူဖြစ်လို့ နေပါတော့တယ်။



ချမ်းညီချို
06-06-2011